Në ambientet e Ambasadës së Shqipërisë në Athinë u organizua një mbrëmje letrare e veçantë, e dedikuar promovimit të romanit “Vajzat e Mjegullës” të autorit të njohur Namik Dokle, tashmë i përkthyer edhe në gjuhën greke.

Në këtë event morën pjesë shkrimtarë, poetë, gazetarë, artistë, diplomatë dhe artëdashës të komunitetit shqiptar në Greqi, si edhe lexues grekë, të cilët ndanë mendime dhe reflektime mbi veprën dhe figurën e autorit.

Në fjalën e saj përshëndetëse, Ambasadorja znj. Luela Hajdaraga, e cilësoi Doklen si një figurë shumëdimensionale dhe një emër të konsoliduar të letrave shqipe, duke theksuar se ai do të zërë vend në antologjinë e letërsisë shqiptare si një zë i arsyes, mbrojtës i parimeve europiane, simbol i fjalës së lirë dhe profesionalizmit, duke u mbështetur në vlerat themelore të integritetit, guximit dhe përgjegjësisë.

Gjatë diskutimeve u vlerësua jo vetëm figura e autorit si shkrimtar, politikan dhe gazetar, por edhe mënyra se si ai trajton temat sociale që kanë shoqëruar shoqërinë shqiptare në periudhën e regjimit totalitar, me theks të veçantë tek pozita e gruas.

Ky aktivitet ishte një dëshmi tjetër e vlerës që gëzon letërsia shqipe në shoqërinë greke dhe e interesit të ndërsjellë kulturor mes dy popujve tanë.