Sot u zhvillua dita e parë e tryezës “Për Mbledhjen Sistematike dhe të Qëndrueshme të të Dhënave të Detajuara dhe Statistikave mbi Barazinë dhe Krimet e Urrejtjes”, një aktivitet i organizuar dhe drejtuar nga Ministria e Drejtësisë, në bashkëpunim me Agjencinë e BE-së për të Drejtat Themelore (FRA) dhe OSBE/ODIHR.

Në fokus të diskutimeve të sotme, ishte mbledhja dhe përdorimi i të dhënave për barazinë, me pjesëmarrjen e institucioneve kyçe kombëtare dhe ndërkombëtare, për të ndarë praktikat dhe për të përforcuar bashkëpunimin ndërinstitucional në këtë fushë.

E pranishme në këtë tryezë, Avokatja e Popullit, Erinda Ballanca tha se “të dhënat e sakta na orientojnë drejt për të kuptuar hendekun mes perceptimit dhe realitetit të gjendjes së të drejtave të njeriut në Shqipëri”.

Avokatja e Popullit nënvizoi se vetëm përmes mbledhjes së rregullt dhe transparente të të dhënave mund të ndërtohen politika të besueshme dhe të matet realisht progresi i vendit në fushën e të drejtave të njeriut.

Ajo e cilësoi bashkëpunimin me FRA si një partneritet strategjik për Shqipërinë në procesin e integrimit evropian.

Kjo tryezë është dëshmi e angazhimit të strukturave dhe institucioneve në vend për forcimin e sistemit të të dhënave mbi barazinë dhe për përmbushjen e standardeve evropiane në mbrojtje të të drejtave themelore.

Burimi ATSH