Zonat e mbrojtura në Shqipëri po bëhen gjithnjë e më shumë destinacioni i preferuar për dashamirësit e natyrës dhe aventurës.

Ministrja në detyrë e Turizmit dhe Mjedisit, Mirela Kumbaro publikoi sot në rrjetet sociale shifrat e vizitorëve në zonat e mbrojtura gjatë periudhës janar-gusht të këtij viti.

“4 milionë vizitorë shijuan dhe përjetuan magjinë e ofruar nga Zonat e Mbrojtura deri në muajin gusht, ose 200 mijë më shumë se një vit më parë”, theksoi Kumbaro.

Ministrja Kumbaro u shpreh se “kjo nuk është thjesht një shifër, por një tregues kuptimplotë i rritjes së turizmit të përgjegjshëm dhe të natyrës, ndërsa Shqipëria po punon për përfshirjen në Listën e Gjelbër të IUCN me 5 Parqe Kombëtare, duke afirmuar angazhimin tonë në rrjetin ndërkombëtar të zonave të mbrojtura”.

Sipas shifrave të publikuara nga Kumbaro, zonat e mbrojtura në periudhën janar-gusht 2024 u vizituan nga 3,8 milionë vizitorë.

Zonat e mbrojtura janë kthyer në destinacione turistike mjaft të vizituara për shkak të bukurive natyrore dhe relievit të larmishëm, i cili është i përshtatshëm për turistët, që nga ata që duan të shijojnë natyrën, deri tek turistët aventurierë të cilët mund ta eksplorojnë zonën duke bërë hiking nëpër shtigje të ndryshme.

Përveç ecjeve në shtigjet e zonave të mbrojtura vitet e fundit vizitorët po tregojnë interes edhe për turizmin e vëzhgimit të shpendëve, sidomos të atyre ujorë, si në Parkun Kombëtar Divjakë-Karavasta, lagunën e Nartës, lagunën e Kune-Vainit, liqenin e Shkodrës, liqenin e Pogradecit, etj.

Zgjerimi i zonave të mbrojtura në Shqipëri synon të rrisë integritetin e këtyre zonave, për gjendjen e paprekur të tyre, krahasuar me zona të tjera të vendit, për biodiversitetin e lartë dhe për habitatet e rralla që bartin.

Burimi ATSH