Dhoma Amerikane e Tregtisë në Shqipëri (AmCham) ka iniciuar krijimin e Komitetit të Sipërmarrësve të Rinj dhe Inovacionit, një platformë që ka për qëllim forcimin e lidhjeve mes gjeneratës së re të profesionistëve dhe kompanive amerikane që operojnë në rajon.

Sipas AmCham, Komiteti synon të krijojë mundësi për të rinjtë shqiptarë për t’u lidhur me liderë të korporatave ndërkombëtare, duke përfshirë mentorimin dhe mbështetje në zhvillimin e ideve të reja dhe startup-eve inovative.

Në kuadër të ngritjes së Komitetit për Sipërmarrësit e Rinj dhe Inovacionin, zëvendëspresidenti i Dhomës Amerikane të Tregtisë në Shqipëri, Rexhino Cekrezi, dhe drejtori ekzekutiv, Neritan Mullaj, zhvilluan së fundmi një seri takimesh të rëndësishme në Bruksel me përfaqësues të AmChams in Europe dhe AmCham Belgium.

“Qëllimi i këtyre takimeve ishte të kuptojmë më mirë se si strukturat ekzistuese në Evropë funksionojnë në fushën e angazhimit të të rinjve, përfshirjes së bizneseve në programet e mentorimit, dhe forcimit të lidhjeve transatlantike përmes sipërmarrjes dhe teknologjisë”, bën të ditur AmCham.

Një pjesë e rëndësishme e diskutimeve u përqendrua në rolin e partnerëve të biznesit dhe organizatave jofitimprurëse, të cilët janë aktivë edhe në Shqipëri, dhe se si ata mund të kontribuojnë në zhvillimin e këtyre nismave.

Burimi ATSH