Tirana do të shndërrohet në kryeqytetin e argëtimit për fëmijët nga data 19 deri më 21 shtator, me organizimin e panairit “FUN FAIR ’25” një event, që vjen për herë të parë në formatin e një panairi 3-ditor në Shqipëri.

Ministri i Ekonomisë, Kulturës dhe Inovacionit, Blendi Gonxhja, ndau në rrjetet sociale pamje nga përgatitjet, që po bëhen pranë sheshit “Italia”, në Tiranë, ku do të zhvillohet ky panair, duke e cilësuar si “festën më të madhe të fëmijëve”.

“‘FUN FAIR’ është festa më e madhe e fëmijëve, që për herë të parë vjen në formatin e një panairi 3-ditor plot surpriza dhe argëtim”, shkroi Gonxhja.

Panairi do të zgjasë 3 ditë, nga ora 17:00-22:00 dhe premton një eksperiencë të paharrueshme për më të vegjlit, me surpriza, lojëra, aktivitete kreative, argëtim dhe inovacion.

Fmijët, gjatë ditëve të panairit do të njihen me ekspozita me piktura dhe instalacione, lojëra kreative e argëtuese, aktivitete artistike të ndryshme. Në skenën magjike të Fun Fair, gjatë të tre ditëve, do të shfaqet një program i veçantë me numra artistikë që janë përgatitur posaçërisht për fëmijët.

Kjo iniciativë është pjesë e vizionit të ri për zhvillimin e kulturës dhe inovacionit tek fëmijët, duke i përfshirë ata në aktivitete sociale dhe zbavitëse. FUN FAIR synon të sjellë jo vetëm argëtim, por edhe edukim përmes lojës dhe inovacionit.

Aktiviteti vjen në bashkëpunim mes institucioneve të linjës dhe mbështetet nga MEKI dhe Bashkia e Tiranës.