Dokumentari më i ri i regjisorit shqiptar Roland Sejko, “Film di Stato”, u shfaq premierë në Festivalin e Filmit të Venecias, në seksionin Notti Veneziane, të kuruar nga Giornate degli Autori në bashkëpunim me Isola Edipo.

Zëvendësministrja e Ekonomisë, Kulturës dhe Inovacionit, Lira Pipa, së bashku me kryetarin e QKK-së, Jonid Jorgji, dhe drejtorin e AQSHF-së, Eljan Tanini, ndoqën premierën, duke vlerësuar rëndësinë e këtij projekti për promovimin e kinemasë dokumentare shqiptare në skenën ndërkombëtare.

Prodhuar dhe shpërndarë nga Luce Cinecittà, dokumentari ofron një udhëtim vizual në periudhën e diktaturës shqiptare (1945–1990), duke përdorur materiale arkivore të papublikuara më parë, përfshirë arkiva nga Arkivi Qendror Shtetëror i Filmit, për të zbuluar ritmet, heshtjet dhe mekanizmat e propagandës së kohës.

Me këtë vepër, Sejko, i vlerësuar më parë me çmime prestigjioze si David di Donatello për “Anija – The Ship” dhe Nastro d’Argento për “The Image Machine of Alfredo C.”, demonstron fuqinë e artit dokumentar për të rikthyer historinë dhe për ta bërë atë objekt reflektimi të ri.

Premierë e këtij dokumentari shënon një moment të rëndësishëm për kinemanë shqiptare në një prej skenave më prestigjioze ndërkombëtare.

Burimi ATSH