Në përvjetorin e 105-të të Luftës së Vlorës, kryetari i bashkisë së Vlorës, Ermal Dredha, vendosi një kurorë me lule në monumentin që kujton këtë moment të rëndësishëm të historisë së Shqipërisë.

“Nga Memoriali i Luftës së Vlorës, në 105-vjetorin e saj, për të kujtuar me mirënjohje dhe respekt të posaçëm, trimat që na dhanë lirinë. Lavdi përjetë Heronjve të Atdheut!”, shkroi kryebashkiaku Dredha në rrjetet sociale.

Memoriali i Luftës së Vlorës përveç se simbol i një prej ngjarjeve më të rëndësishme historike të vendit, është kthyer edhe në një stacion të turistëve që vizitojnë zonën.

Lufta e Vlorës përfundoi më 3 shtator të vitit 1920. Kjo luftë qe një cikël betejash të patriotëve shqiptarë kundër forcave ushtarake italiane, të cilat që më 9 dhjetor 1919 kishin marrë nën protektorat Shqipërinë, pas vendimeve të dala nga Konferenca e Paqes.

Burimi ATSH