Ministri për Europën dhe Punët e Jashtme, Igli Hasani mori pjesë sot në panelin “Rajoni larg të rinjve: koha për ndryshim” të Forumit Strategjik të Bledit 2025, organizuar në Slloveni.

Në fjalën e tij, Hasani theksoi se rinia është motori kryesor i së ardhmes së Ballkanit Perëndimor dhe më gjerë.

“Përfshirja e saj në procesin e integrimit evropian është e pazëvendësueshme”, tha Hasani.

Ministri Hasani u shpreh se “Shqipëria po vendos të rinjtë në qendër të procesit të integrimit, përmes nismave që forcojnë rolin e tyre si kontribues aktivë për të ardhmen tonë të përbashkët evropianë”.

Gjatë ditës së sotme me ftesë të Tanja Fajon, zëvendëskryeministre dhe ministre e Jashtme e Sllovenisë, Hasani zhvilloi një takim me homologët e Ballkanit Perëndimor. Në takim u diskutua për integrimin në BE, sigurinë rajonale dhe bashkëpunimin ekonomik.

“Për Shqipërinë, anëtarësimi në BE është një qëllim kombëtar, por dhe një domosdoshmëri për gjithë rajonin. Përmes bashkëpunimit më të ngushtë në kuadër të BE-së dhe NATO-s, mund të sigurojmë një Ballkan Perëndimor më të qëndrueshëm, më të bashkuar dhe me të ardhme evropiane”, – është shprehur ministri Hasani.

Ky vit shënon 20-vjetorin e Forumit Strategjik të Bledit, një konferencë e rëndësishme ndërkombëtare në Evropën Qendrore dhe Juglindore që bashkon udhëheqës botërorë nga fusha të ndryshme për dialog strategjik në nivel të lartë.

Përgjatë dy ditëve të pjesëmarrjes në Forumin Strategjik të Bledit, ministri Hasani ka pasur një agjendë të ngjeshur takimesh me homologë dhe partnerë nga bota, si me ministrin e Shtetit në Zyrën Federale Gjermane, ministrin e Punëve të Jashtme të Jordanisë, ministrin e Punëve të Jashtme të Egjiptit, përfaqësues të Këshillit Atlantik, përfaqësuesin e Posaçëm të Bashkimit Evropian për Dialogun Beograd–Prishtinë etj.