Në kuadër të aksionit “Male të Pastra” në Parkun Kombëtar të Llogorasë u pastruan 550 kg mbetje.

Ministrja e Turizmit dhe Mjedisit, Mirela Kumbaro ndau sot momente nga ky aksion i zhvilluar nga stafi i Zonave të Mbrojtura në Vlorë.

“Nisma “Male të Pastra” i gjeti në Parkun Kombëtar të Llogarasë. 550 kg mbetje arritën të grumbulloheshin falë aksionit të ndërmarrë nga stafi i AdZM Vlorë, institucionet vendore, organizata dhe vullnetarë, të cilët iu bashkuan me shumë dëshirë kësaj nisme, edhe për të rikujtuar se sa herë që shijojmë pasuritë natyrore, të kujdesemi edhe për t’i lënë më të pastra nga sa i gjetëm”, u shpreh Kumbaro.

Nisma “Male të Pastra” është një aksion pastrimi që po zhvillohet sot i organizuar nga Agjencia Kombëtare e Zonave të Mbrojtura në dhjetë parqe kombëtare e natyrore.

Kumbaro ndau po ashtu momente nga aksioni në rrethinat e Tiranës. Stafi i Administratës së Zonave të Mbrojtura Tiranë në bashkëpunim me Agjencinë e Parqeve dhe Rekreacionit, zhvilluan aksionin e pastrimit pranë një prej atraksioneve më të frekuentuara nga turistët, siç është Ujëvara e Përroit të Kecit në Shëngjergj.

Teksa eksploroni atraksionet natyrore, mos harroni të kujdeseni edhe për mbetjet””, ishte thirrja e ministres drejtuar vizitorëve.

Vitin e kaluar ky aksion pastrimi angazhoi qindra vullnetarë, të cilët larguan qindra kilogramë mbetje nga parqet kombëtare.

Këtë vit fushata do të shtrihet në Parqet Kombëtare të Dajtit, Tomorit, Llogorasë, Qafështamës, Zagorisë, Prespës, Shebenik, Korab-Koritnik si dhe në Alpet Shqiptare.