Banka e Shqipërisë me objektiv rritjen e rezervës valutore, ka zhvilluar tre ankande për blerjen e valutës, në bankat e nivelit të dytë, gjatë tremujorit të parë të vitit 2025.

Sipas njoftimit të publikuar në faqen zyrtare të Bankës së Shqipërisë, në tre ankandet e zhvilluara gjatë periudhës janar-mars 2025, janë blerë 33,20 milionë euro me një mesatare 11,07 milionë euro në muaj, kundrejt mesatares prej 14,20 milionë euro gjatë vitit 2024.

Shuma e blerë ka qenë pak më e lartë me shumën e blerë në tre ankandeve në të njëjtën kohë një vit më parë prej 32,60 milionë euro, duke treguar se pjesëmarrja relativisht më e ulët e bankave lidhet me faktorë sezonalë.

Banka e Shqipërisë synon që gjatë këtij viti të blejë nga bankat tregtare 270-350 milionë euro, rreth 20 milionë euro më shumë se në 2024-n. Sipas kalendarit të ndërhyrjeve, numri më i madh i ankandeve është planifikuar në tremujorin e dytë dhe të tretë, atëherë ku flukset e euros janë më të larta, si rezultat i të ardhurave nga turistët.

Hovi që ka shënuar turizmi me fluksin e vizitorëve të huaj, rritja e investimeve të huaja dhe e eksporteve ka sjellë prani të madhe të euros në treg, çka ka sjellë zhvlerësim të monedhës europiane në raport me lekun. 1 euro ka vijuar të këmbehet me më pak se 100 lekë, ndërsa vetëm në 30 janar do të kishte një barazim të dy monedhave. Tërheqjet e euros nga Banka e Shqipërisë rrisin ofertën e lekut në treg.

Burimi ATSH