Zëvendëskryeministrja, njëherësh ministrja e Infrastrukturës dhe Energjisë, Belinda Balluku, deklaroi se edhe për këtë sezon turistik janë marrë masa konkrete për të garantuar furnizim të pandërprerë me energji elektrike.

Gjatë një takimi me krerë të institucioneve të varësisë, mbi arritjet, sfidat dhe masat e marra për menaxhimin e sezonit turistik, Balluku tha se tashmë është një plan masash i mirëfilltë.

“Edhe për këtë sezon turistik kemi marrë masa konkrete për të garantuar furnizim të pandërprerë me energji elektrike. Krahas investimeve të reja që sot janë në funksion, në terren janë angazhuar 880 punonjës, si dhe janë ngritur pikat e shërbimit 24/7, jo vetëm në zonat bregdetare, por edhe ato malore për t’ju përgjigjur në kohë çdo problematike”, tha Balluku.

“Kemi mbi 30 pika 24-orëshe shërbimi për abonentët tanë qofshin familjarë apo biznese ku mund të adresojnë të gjithë problematikat”, theksoi ajo.

Ministrja Balluku tha se kërkesa për furnizimin me energji elektrike është shtuar gjatë çdo viti.

“Dua të nënvizoj një fakt që është shumë i rëndësishëm. Ndërkohë që investojmë, që ulim çmimin për abonentin që kemi plane afatgjata për të realizuar, duhet pasur kujdes lufta kundër informalitetit”, vuri në dukje Balluku.

“Lufta kundër informalitetit në sektorin e energjisë është shumë e rëndësishme, pasi nëse duam të ulim humbjet më tej, nëse duam të ulim çmimin për abonentët tanë duhet të rrisim performacën financiare ekonomike që ka të bëjë me uljen e informalitetit”, theksoi Balluku duke shtuar se kjo është një tjetër detyrë që ka secili prej jush përveç faktit që gatishmëria duhet të jetë e plotë.

Balluku u shpreh se sistemet janë të automatizuara.

“Është kënaqësi kur dëgjojmë që një pas një rajonet po shkojnë me sisteme kabllore nëntokësore dhe nuk do të jemi më të ekspozuar ndaj agjentëve atmosferikë, por lufta me informalitetin është shumë e rëndësishme duke nisur nga edukimi i abonentëve dhe deri tek penalitetet dhe marrja e masave”, tha Balluku. /