Ministria e Drejtësisë zhvilloi sot një takim me institucionet e drejtësisë dhe partnerët ndërkombëtarë, në tryezën e rrumbullakët “Strategjia Ndërsektoriale e Drejtësisë 2024-2030: Arritjet dhe sfidat e zbatimit të saj në kontekstin e Integrimit Evropian”.

Në fjalën e tij në këtë takim ambasadori i OSBE-së në Shqipëri, Michel Tarran tha se bashkëpunimi i aktorëve vendas dhe ndërkombëtarë është i rëndësishëm në ravijëzimin e sistemit të drejtësisë në vend.

Tarran u shpreh se drejtësia duhet të jetë më afër qytetarëve duke rritur transparencën në ofrimin e shërbimeve.

Ambasadori shtoi se, strategjia e ndërmarrë, arrin të ofrojë një panoramë më të qartë se cilat do duhet të jenë hapat e radhës për transformimin e drejtësisë në Shqipëri drejt standardeve të Bashkimit Evropian.

Ai theksoi se prania e OSBE-së në Shqipëri i mirëpret këto qëllime ambicioze të Shqipërisë për sektorin e drejtësisë.

“Strategjia është një moment kyç që ka për qëllim të ravizojë sistemin e drejtësisë në Shqipëri, në standardet e BE-së, duke u ndërtuar mbi dokumentet e mëparshëm strategjik dhe duke pasqyruar udhërrëfyesin. Ajo ofron një kuadër të qartë për të drejtuar hapat e radhës drejt transformimit. Prania e OSBE-së në Shqipëri, mirëpret këto qëllime ambicioze që përmbahen në këto reforma, të cilat janë të nevojshme dhe vijnë në kohën e duhur për konsolidimin e sistemit të drejtësisë”, tha ai.

Ambasadori cilësoi se kjo fazë aktuale e reformës në drejtësi, është i përqëndruar tek efikasiteti dhe pavarësia e saj si sektor.

Ai theksoi se duhet forcuar transparenca tek publiku lidhur me shërbimet e ofruara të drejtësisë ndaj qytetarëve shqiptarë.

“Kjo fazë e reformës në drejtësi, përqendrohet tek përmirësimi i efikasitetit, pavarësisë. Qëllimi këtu është të konsolidohet kuadri ligjor duke eliminuar dhe punët e prapambetura gjyqësore, për të forcuar llogaridhënien dhe mekanizmat e transparencës për të rritur transparencën ku ofrohen shërbimet dhe për ta afruar drejtësinë më shumë me qytetarët”, tha ai.

Tarran u shpreh se masat e ndërmarra për përdorimin e teknologjive të reja të informacionit në drejtësi, janë të rëndësishme për efikasitetin e sektorit.

“Masat në lidhje me përdorimin e teknologjive të reja të informacionit, përmirësimi i statistikave kombëtare për drejtësinë dhe zhvillimi dhe funksionimi i sistemeve të integruar të menaxhimit të çështjeve, janë gjithashtu hapa të mëtejshme të rëndësishme që do ndihmojnë në rritjen e efikasitetit të sistemit të drejtësisë”.

Tarran vuri theksin se për përmbushjen e këtyre reformave duhet të ketë një financim dinjitoz e të përshtatshëm, si dhe veprime konkrete nga palët e përfshira.

“Zbatimi i suksesshëm do të kërkojë përpjekje të bashkërënduara. Do kërkojë dhe financim të përshtatshëm dhe pjesëmarrje veprore nga aktorët, në mënyrë që të arrihen përfundimet nga ato të synuara. Bashkëpunimi i vazhdueshëm”, tha ai.

Burimi ATSH