Nxitja e bashkëpunimit ndërmjet audituesve të brendshëm, të jashtëm dhe autoriteteve, si dhe ndarja e praktikave më të mira ndërkombëtare në fushën e auditimit, ishte fokusi i Konferencës Rajonale të Auditimit, që u zhvillua në Tiranë, me pjesëmarrjen e audituesve nga Shqipëria, Maqedonia e Veriut dhe vendet e tjera të rajonit.

I pranishëm në këtë Konferencë, Guvernatori i Bankës së Shqipërisë Gent Sejko, tha se, “auditimi i brendshëm ndihmon në identifikimin e hershëm të risqeve, përmirësimin e proceseve dhe mbrojtjen e integritetit institucional”.

Sejko shprehu angazhimin për të mbështetur zhvillimin profesional të audituesve dhe promovimin e një qasje të integruar në qeverisjen institucionale.

“Jemi të bindur se vetëm përmes bashkëpunimit të ngushtë ndërmjet audituesve të brendshëm, të jashtëm dhe autoriteteve mbikëqyrëse, mund të ndërtojmë institucione më të forta, më transparente dhe më të besueshme. Në një kontekst më të gjerë, ku institucionet financiare përballen me sfida të reja si digjitalizimi, rritja e rreziqeve kibernetike, zhvillimet klimatike dhe presionet për qëndrueshmëri, roli i auditorëve dhe sidomos bashkëpunimi mes tyre dhe autoriteteve rregullatore mbetet kyç për ruajtjen e qëndrueshmërisë financiare dhe transparencës”, deklaroi Sejko.

Burimi ATSH