Turizmi në Shqipëri vijon të njohë zhvillim të qëndrueshëm, duke reflektuar rritje të ndjeshme si në numrin e vizitorëve ashtu edhe në qëndrimet e tyre në strukturat akomoduese.

Sipas raportit të publikuar nga INSTAT, numri i vizitorëve është rritur me 21,9% në muajin mars të këtij viti, krahasuar me të njëjtën periudhë të një viti më parë, ku shtesën më të madhe e përbëjnë vizitorët jorezidentë, të cilët janë shtuar me 27,3%, ndërsa vizitorët rezidentë kanë shënuar një rritje prej 13,9%.

Netëqëndrimet gjithashtu janë rritur me 30,8%, me një dominim të netëve të kaluara nga vizitorët jorezidentë që kanë shënuar një rritje prej 32,1%, ndërkohë që netëqëndrimet nga vizitorët vendas janë rritur me 28,4%.

Rritja më e ndjeshme e vizitorëve jorezidentë është regjistruar në zonat jobregdetare me një shtim prej 20,6%, si dhe në hotelet dhe akomodimet e ngjashme ku rritja ka qenë 27,6%.

Në këtë muaj, pjesa më e madhe e vizitorëve të huaj që qëndruan në struktura akomoduese në Shqipëri kanë ardhur nga Italia, duke zënë 23% të totali, ata nga Kosova zunë 15% dhe nga Gjermania me 10%. Ndërkohë që Mbretëria e Bashkuar ka përfaqësuar 7% të vizitorëve dhe Franca 3%.

Këto të dhëna tregojnë një interes gjithnjë në rritje për Shqipërinë si destinacion turistik nga tregjet kryesore të Europës dhe rajonit, duke theksuar potencialin e lartë që ofron vendi si për turizmin bregdetar, ashtu edhe për atë kulturor dhe natyror në zonat e brendshme.

Shkalla e zënies së dhomave të hoteleve në mars 2025 arriti në 18,4%, një rritje krahasuar me 17,3% në të njëjtin muaj të vitit 2024.

Burimi ATSH