Ministri për Evropën dhe Punët e Jashtme, Igli Hasani u shpreh se Shqipëria është e angazhuar në përshpejtimin e reformave dhe mbylljen e negociatave për integrimin në BE deri në 2027-n.

I pranishëm në diskutimin mbi identitetin evropian, që Zyra e BE në Tiranë zhvilloi sot, me profesorë, akademikë dhe studentë në kuadër të “Javës Evropiane”, Hasani vuri në dukje se, pavarësisht zhvillimeve Shqipëria nuk e humbi identitetin evropian.

“BE është i vetmi ent politik në botën e sotme që zgjerohet në paqe dhe ka një listë vendesh kandidate që janë të prirura të bëhen pjesë të BE-së dhe ky hap mbështetet në ndërtimin e demokracive liberale që përbehet nga tri shtylla kryesore: humanizmi, mbizotërimi i ligjit dhe tregu i lirë”, tha Hasani.

Ai theksoi se, Shqipëria ka histori të shumta për të treguar humanizmin saj, ndërsa vijon angazhimin për forcimin e ligjit dhe zhvillimin e tregut të lirë.

“Reforma në drejtësi, në qeverisjen e Kryeministrit Rama, ishte një nga reformat më masive dhe e para hodhi gur themeli në krijimin e një drejtësie të re të pavarur dhe objektive”, u shpreh ministri.

Hasani theksoi se, Shqipëria ka punuar fort për të harmonizuar politikat, institucionet dhe praktikat e saj me standardet e BE-së.

“Sot Shqipëria është në një rrugë të qartë drejt anëtarësimit të plotë në BE, me synimin për të përfunduar të gjitha reformat kryesore deri në vitin 2027 dhe për t’iu bashkuar Bashkimit Evropian. Ndërsa me avancojmë, BE është krye të këtij angazhimi dhe na mbështet në këtë moment kyç për procesin”, deklaroi Hasani.

Burimi ATSH