Ekonomia e ka nisur vitin 2025 mbi baza të shëndosha dhe tregues pozitivë ekonomikë e financiarë.

Banka e Shqipërisë publikoi sot raportin mbi ekonominë për 3-mujorin e dytë 2025, ku thekson se, “aktiviteti ekonomik ka vijuar të rritet, duke nxitur rritjen e punësimit dhe të pagave, ndërsa inflacioni ka qëndruar pranë nivelit 2%. Në të njëjtën kohë, kushtet e financimit për ekonominë kanë mbetur të favorshme dhe rritja e kreditimit ka përkrahur konsumin dhe investimet private”.

Sipas BSH-së, këto zhvillime pasqyrojnë një ambient makroekonomik të qëndrueshëm dhe një sistem bankar të fortë.

Në veçanti, ulja e inflacionit nga nivelet e larta të periudhës postpandemike ka përmirësuar fuqinë blerëse të qytetarëve shqiptarë dhe ka krijuar një mjedis më të qëndrueshëm për vendimmarrjen e bizneseve.

Banka e Shqipërisë, thekson se mbetet e përkushtuar për stabilitetin e çmimeve.

“Ulja e normës bazë të interesit në 2,75%, si dhe mbajtja e saj e pandryshuar në vijim ka dhënë një ndikim pozitiv në ekonomi. Ky qëndrim ka kontribuar në uljen e kostove të financimit për bizneset dhe familjet, në rritjen e kreditimit dhe në mbështetjen e aktivitetit ekonomik. Njëkohësisht, ai ka ndihmuar në menaxhimin e pritjeve për inflacionin, në prani të goditjeve nga jashtë, duke krijuar kushte të përshtatshme për kthimin e tij në objektiv”, thuhet në raportin e BSH-së, ku nënvizon se, “perspektiva për të ardhmen mbetet pozitive”.

Raporti vëren se, ekonomia shqiptare pritet të rritet afër potencialit të saj dhe inflacioni të stabilizohet pranë objektivit 3% brenda vitit 2026.

“Kjo rritje do të mbështetet nga bilancet e shëndetshme të sektorit privat, klima e qëndrueshme e besimit dhe vazhdimi i politikave makroekonomike të kujdesshme. Ndërkohë, rritja e punësimit dhe e pagave do të forcojnë më tej fuqinë blerëse të qytetarëve dhe do të përmirësojnë standardin e jetesës”, thekson BSH-ja.

Burimi ATSH