Presidenti i Ukrainës, Volodymyr Zelensky i pranishëm në Samitin e Komunitetit Politik Evropian që po mbahet në Tiranë, ka zhvilluar një bisedë telefonike me Presidentin e SHBA-ve, Donald Trump.

“Së bashku me presidentin francez, Emmanuel Macron, kancelarin gjerman, Friedrich Merz, kryeministrin britanik, Keir Starmer dhe kryeministrin polak, Donald Tusk zhvilluam sot një bisedë telefonike me presidentin e SHBA-së, Donald Trump, tha sot presidenti ukrainas, Volodymyr Zelenksy në Facebook.

“Ne diskutuam takimin e negociatave të paqes Rusi-Ukrainë, të planifikuar sot në Stamboll”, shtoi Zelensky.

“Ukraina është gati të ndërmarrë hapat më të shpejtë të mundshëm për të sjellë një paqe të vërtetë dhe është e rëndësishme që bota të mbajë një qëndrim të fortë”, shtoi presidenti ukrainas.

“Qëndrimi ynë – nëse rusët refuzojnë një armëpushim të plotë dhe pa kushte dhe një fund të vrasjeve, duhet të pasohet nga sanksione të ashpra. Presioni mbi Rusinë duhet të mbahet derisa Rusia të jetë gati t’i japë fund luftës”, theksoi Zelensky.

“Faleminderit të gjithëve në botë që po na ndihmoni”, shtoi ai.

Më shumë se 40 udhëheqës, përfshirë presidentin ukrainas, Vlodymyr Zelensky, udhëtuan në kryeqytetin shqiptar, Tiranë – për takimin e gjashtë të Komunitetit Politik Evropian (EPC).

I bashkë-organizuar nga kryeministri, Edi Rama dhe presidenti i Këshillit Evropian, Antonio Costa, udhëheqësit diskutuan sfidat e sigurisë, inovacionin dhe qëndrueshmërinë ekonomike, si dhe migracionin dhe mundësitë për të rinjtë.

Burimi ATSH