Kryetari i Partisë Demokratike Sali Berisha zhvilloi sot takimin përmbyllës elektoral në qytetin e Elbasanit.

Gjatë fjalës së tij Berisha prezantoi programin e PD – Aleanca për Shqipërinë Madhështore, ku u ndal edhe tek arsimi dhe rinia.

Berisha tha se po “rritet me shpejtësi të madhe analfabetizmi”.

“Zero tolerancë ndaj analfabetizmit. Do bëhet gjithçka që asnjë fëmijë të mos mbetet analfabet”, tha Berisha.

Berisha theksoi më tej se “do bëhet çdo përpjekje që fëmijët të mbarojnë shkollat 9-vjeçare dhe të gjithë, pa përjashtim, shkollat e mesme. Ne zotohemi se do konsiderojmë në mënyrën më serioze arsimin e mesëm të detyrueshëm për të gjithë fëmijët shqiptarë”.

Kreu i PD-së shtoi se do të hiqet mesatarja për të konkurruar në universitete.

“Jeta akademike do rigjallërohet. Autonomia dhe liria akademike do rikthehet në universitetet tona. Universiteti dhe shkolla në tërësi do jetë në partneritet të plotë me sipërmarrjet”, tha Berisha.

Berisha tha më tej se “çdo i ri që diplomohet, brenda një viti do ketë punë në sektorin publik ose privat. Qeveria do paguajë një vit sigurimet shoqërore për ta. Sipërmarrësit që punësojnë të rinj nën 30 vjeç, mund të përfitojnë ulje gjer në 70 për qind të taksave”.

“Shteti do krijojë fondin e sipërmarrjes së të rinjve. 10 milionë euro në vit për startup-et e të rinjve. 5 mijë euro grant për çdo të ri që nis një biznes dhe kredi të buta më pas për suksesin e tij”, tha Berisha.

Bërisha nënvizoi se “do investojmë për rininë tonë, është investim jetik, vendimtar për ne, përndryshe na pret fati i shumë kombeve të tjera që janë zhdukur në histori”.

“Rikthimi i kombit në rini është misioni më i shenjtë që mund të ndërmarrim së bashku”, u shpreh Berisha.