Kryeministri Edi Rama, njëherësh kryetar i Partisë Socialiste bëri thirrje sot që në 11 maj çdo shqiptar t’i bashkohet Partisë Socialiste, pavarësisht bindjeve politike, për Shqipërinë në Bashkimin Europian.

Në takimin përmbyllës elektoral në Librazhd, Rama ironizoi po ashtu edhe deklaratat e Tomor Alizotit, drejtuesit politik të Partisë Demokratike për qarkun e Elbasanit.

“Kam ardhur me shumë frikë dhe gati gati isha duke u kthyer mbrapsht se ka dalë njeri këtej dhe thotë se do na hajë të gjallë. Sot kemi edhe një takim të madh përmbyllës në Elbasan. Unë ju falënderoj shumë që jeni kaq shumë këtu se duke ju parë kaq shumë edhe mua më del pak frika se ai kur thotë do hamë, ai ha me gjithë mend”, ironizoi Rama.

Rama tha se në këtë takim do të bëjë një pasqyrë të asaj që duhet mbajtur parasysh mbi Shqipërinë sot dhe pse, siç u shpreh ai, “kemi të gjitha arsyet të besojmë se do të bëjmë më mirë në vijim për Shqipërinë nesër”.

“Ky është një moment jashtëzakonisht i rëndësishëm. Është e domosdoshme të bëjmë të gjitha përpjekjet që çdo shqiptar, çdokush që ka të drejtën e votës edhe pse akoma mund të jetë krejt në anën tjetër, të bindet që në 11 maj duhet të na bashkohet”, tha Rama.

Kryeministri theksoi se tanimë shumica e shqiptarëve e dinë shumë mirë që vendi po shkon në drejtimin e duhur, ekonomia po përmirësohet vijimësisht dhe do të jetë më mirë në vitet në vijim.

“E dinë shumë mirë që e gjitha kjo ka ardhur nga mbështetja për PS-në dhe të gjitha ato që presim dhe duam do të vijnë duke u mbështetur te njeri-tjetri, në PS”, shtoi Rama.

Burimi ATSH