Kryeministri dhe njëherazi kryetari i Partisë Socialiste, Edi Rama deklaroi sot se Kavaja është transformuar dhe ka dalë nga plehrat e harresës në të cilën ishte zhytur.

Në fjalën e tij gjatë një takimi në Kavajë për prezantimin e arritjeve kryesore për sektorët më të rëndësishëm dhe sfidat e Shqipërisë 2030 në BE, Rama tha se “siç e kam thënë edhe më parë, ne nuk jemi më të mirët, por më të mirë se ne s’kanë ku gjejnë ata që kërkojnë, ndërkohë që ju që jeni këtu, jeni këtu se s’ka më të mirë se ju”.

“Kur Pandeli Majko më kërkoi për të folur për fushatën edhe më tha: “Më vjen mirë që jam në Kavajë dhe në Rrogozhinë, por të të pyes, – tha, – pse?” I thashë: do ta jap përgjigjen një ditë. Sot është momenti për të dhënë përgjigjen. Ky bulevard nuk ekzistonte kur ne morëm detyrën, ky qytet ekzistonte, por nuk ishte ky qytet që është sot dhe këtë mund ta dëshmojë çdo qytetar i Kavajës, pavarësisht bindjeve”, theksoi Rama.

“Nuk besoj se dikush sado inat të na ketë ose të më ketë mua, mos të na japë këtë hak që Kavajën ne e nxorëm nga plehrat e harresës dhe të një përçmimi që i vinte jo nga ne, që nuk na kishte votuar kurrë Kavaja por i vinte nga ata që Kavaja u kishte dhënë mbështetje pa kushte për gati çerekshekulli”, vijoi Kryeministri.

“Sot nuk ka në Kavajë një vend, një ndryshim që e bën këtë qytet shumë më tërheqës, më mesdhetar, më europian siç është gjithë ky territor që nuk ka vulën e mbështetjes time dhe të PS-së për Kavajën”, tha Rama.

Burimi ATSH