Kryeministri Edi Rama deklaroi sot nga Athina se 95% të shërbimeve shqiptarët brenda dhe jashtë vendit e marrin tanimë përmes platformës e-Albania.

Në një takim me shqiptarët në Athinë, në kuadër të turit me diasporën, Rama kujtoi se deri dje për të marrë një copë letër dhe një certifikatë shqiptarët jashtë vendit duhet të vinin në Shqipëri.

“Ndërsa sot nga Greqia dhe Australia mund të marrësh shërbime drejtpërdrejt në platformën e shërbimeve e-Albania. Aty merret pjesa dërrmuese e shërbimeve, 95% e shërbimeve, nuk ka nevojë fare as të vish në Shqipëri, as të takosh administratën, as të fusësh mik e t’i japësh lekë njeriu. Mjafton të futesh në e-Albania dhe merr shërbimin”, tha Rama.

Duke iu përgjigjur një shqiptareje që jeton në Athinë e cila ngriti problematikat e saj në takimin me kryeministrin, Rama theksoi se “e vërteta duhet vendosur aty ku është”.

“Unë nuk mund të them dot ty se administrata është shkëlqyeshëm, por kur më thua zero them jo. Se po të ishte zero nuk na thoshte BE-ja ‘hajdeni futuni në BE’. Negociatat që bëjmë me BE-në janë pikërisht këto dhe kur BE të thotë ‘hajde futu’, do të thotë se ti je një shtet që funksionon si shtet i BE-së”, shtoi Rama.

Burimi ATSH