Kryeministri Edi Rama, njëkohësisht kryetar i Partisë Socialiste deklaroi sot nga Kreta se në zgjedhjet e 11 majit, PS paraqitet me skuadrën që ka më shumë të reja dhe të rinj se të gjitha partitë e tjera të marra së bashku dhe skuadrën që ka më shumë eksperiencë në qeverisje.

Në një takim me shqiptarët në Kretë, Greqi, në kuadër të turit të takimeve me diasporën, Rama foli për listat e kandidatëve për zgjedhjet e 11 majit dhe alternativat që ofrojnë subjektet e ndryshme zgjedhore.

“Kemi ata shitësit e qilimave që i keni parë që dalin nëpër diasporë dhe thonë na e jepni votën ne, rinisë. Dhe ata rinia në listat e kandidatëve kanë babain, mamanë, xhaxhanë, dajën, krushkun sepse nuk i kanë dot aq njerëz sa t’i vendosin në lista. Kjo është mënyra se si e shohin ata besnikërinë ndaj partisë”, tha Rama.

Ndërkohë, Kryeministri u shpreh krenar sepse PS u ka dhënë të gjithë shqiptarëve brenda dhe jashtë vendit, në çdo qark dhe komunitet një skuadër që është skuadra e partisë më të re dhe e partisë më të vjetër”.

“PS ka skuadrën që ka më shumë vajza dhe djem, të reja dhe të rinj, se të gjitha partitë e tjera të marra së bashku dhe skuadrën që ka më shumë eksperiencë në qeverisje dhe rrugën për ta vënë flamurin kombëtar aty ku i ka takuar me shekuj, se sa kanë të gjitha partitë e tjera të marra së bashku”, tha Rama.

Burimi ATSH