Kryetarja e Autoritetit të Mediave Audiovizive, Armela Krasniqi mori pjesë në takimin e Aleancës Kundër Gjuhës së Urrejtjes, organizuar nga Këshilli i Europës.

Me pjesëmarrjen e shefes së zyrës së KiE në Tiranë, Giulia Re, shefes së Sektorit të Drejtësisë pranë Delegacionin e BE-së, Cinzia Tarletti dhe drejtues të institucioneve të tjera, pjesë e Aleancës, në takim u diskutua mbi temën, “Edukimi mediatik si një mjet për të luftuar Gjuhën e Urrejtjes”.

“Ne në AMA, jemi të investuar dhe shumë të kujdesshëm në këtë proces sepse besojmë se edukimi mediatik është investimi më i sigurt, afatgjatë dhe i suksesshëm në mbrojtjen e publikut nga çdo lloj përmbajtje e dëmshme për të, përfshirë edhe mbrojtjen nga gjuha e urrejtjes”, tha Krasniqi në një postim në rrjetet sociale.

“Gjuha e urrejtjes është një temë diskutimi globale. Në dekadën e fundit, media dhe komunikimi kanë ndryshuar rrënjësisht dhe teknologjia e ka përmbysur formulën klasike të komunikimit. Kjo metamorfozë e jashtëzakonshme, përveç përfitimeve ka sjellë fenomene të dëmshme, ndër të cilat është edhe gjuha e urrejtjes. Për këtë arsye, rritja e ndërgjegjësimit të opinionit publik, vetëdija për rrezikun që vjen nga gjuha e urrejtjes, dija për adresimin në mënyrë efektive të problematikës që rrjedh nga gjuha e urrejtjes, janë të rëndësishme”, nënvizoi Krasniqi.

Krasniqi u shpreh se “me kontributin e të gjithëve, ndarjen e përgjegjësive dhe gjetjet e zgjidhjeve të duhura mund të kontribuojmë për ndërtimin e një shoqërie të mirinformuar, gjithëpërfshirëse dhe të aftë në marrjen e vendimeve të duhura”.

Partnerët themelues të Aleancës Kundër Gjuhës së Urrejtjes janë: Autoriteti i Mediave Audiovizive, Këshilli Shqiptar i Medias, Komisioneri për Mbrojtjen nga Diskriminimi dhe Avokati i Popullit.

Burimi ATSH