Kryeministri, njëherazi kryetari i Partisë Socialiste, Edi Rama ka zhvilluar sot një takim me asambletë socialiste të njësive, 5, 6, 13 dhe 14 në Tiranë. Gjatë fjalës së tij, Rama ka thënë se ekziston një problem jo i vogël me Hipotekën.

Rama shtoi se nëse nuk votohet PS-ja nuk ka shans që të plotësohet për dy vite objektivi i transformimit të Kadastrës në një shërbim digjital nga A, tek Zh.

“Tani, pyetja është, ky problemi që kemi me hipotekën është një arsye për ta votuar Partinë Socialiste apo është një arsye për të mos e votuar Partinë Socialiste? Kjo është pyetja. Dhe më duket mua që kjo pyetje është, nuk do as mënd, as kalem, se në qoftë se nuk e voton Partinë Socialiste, nuk ka shans që në këto dy vite e pak të mbetura për të plotësuar përfundimisht objektivin e transformimit komplet të Kadastrës në një shërbim nga A-ja tek Zh-ja digjital, siç kemi ato të tjerat, sepse e kemi angazhim me Bashkimin Europian këtë gjë, të vijnë ta bëjnë të mosozotshmit. Kush ta bëjë? Këneta ta bëjë? s’ka shans. Nuk mund ta humbi Shqipëria këtë moment. Besoni, është momenti kyç në historinë tonë. Ne duhet të jemi aty, duhet të jemi gati, siç kemi qenë deri tani”, tha Rama.

Rama theksoi se “dy letra të tjera na kanë ardhur në fund të janarit, në fillim të shkurtit, për të hapur prap dy grup-kapituj të tjerë, pra faktikisht kemi bërë hapjen më të shpejtë të kapitujve nga të gjithë vendet e tjera krahasimisht, sepse po ia bëjmë hyzmetin shumë fortë kësaj pune që të arrijmë është hapur një derë, duhet të hyjmë brenda”.