Potencialet turistike të qytetit të Sarandës u prezantuan në Panairin “Tourism Travel Show Albania”, që u zhvillua në Tiranë disa ditë më parë.

Ministrja e Bujqësisë dhe Zhvillimit Rural, Anila Denaj ndau në rrjete sociale pamje nga ambientet e panairit dhe pavijonit turistik të Bashkisë Sarandë, ku prezentohen bukuritë natyrore dhe atraksionet kulturore të kësaj zone.

“Oferta turistike e Sarandës u prezantua me krenari në Panairin “Tourism Travel Show Albania”, duke promovuar bukuritë natyrore, atraksionet kulturore dhe përvojat unike që kjo perlë e jugut të Shqipërisë, tashmë një destinacion gjithëvjetor, u ofron vizitorëve nga e gjithë bota”, shkruan Denaj.

I përkufizuar si “Qyteti i bardhë”, Saranda është e rrethuar nga kodra dhe përballë saj ndodhet ishulli grek i Korfuzit. Përveç diellit e plazhit, Saranda njihet dhe për historinë dhe kulturën e saj: e magjishme është kalaja e Lëkurësit, ndërsa Parku Arkeologjik i Butrintit kuriozon turistët e shumtë me historinë e tij mijëravjeçare.