Prefektja e qarkut të Shkodrës, Majlinda Angoni mblodhi sot Taskforcën Antikanabis, ku kërkoi që secili nga anëtarët e kësaj taskforce të marrë përgjegjësitë për të ndjekur me përparësi luftën kundër kultivimit të kanabisit.

“Kam një mesazh për të gjithë drejtuesit e institucioneve, për të gjithë kryetarët e bashkive, që të marrin përgjegjësi konkrete sipas ligjit që i përcakton, për të qenë në hapat e parë të parandalimit të këtij akti”, tha Angoni.

Angoni bën të ditur se, gjatë diskutimeve ka shprehur domosdoshmërinë e anëtarëve të Task Forcës për të treguar një ritëm të lartë pune, një intensitet të lartë kontrollesh në terren duke shfrytëzuar të gjithë sistemet e informacionit të cilat do bëjnë të mundur një kontroll të plotë e një monitorim rigoroz të territorit Qarku Shkodër.

“Shkodra vazhdon të regjistrojë nivelin më të lartë të kultivimit të kanabisit, ndërsa metodat e kultivimit të kanabisit kanë ndryshuar dhe janë sofistikuar. Angazhimi ynë mbetet i plotë dhe i pandalshëm për ta çrrënjosur këtë aktivitet të paligjshëm, me bashkëpunimin e ngushtë të të gjitha institucioneve vendore dhe qendrore, duke synuar ta kthejmë Shkodrën në një model suksesi në luftën kundër narkotikëve”, thekson Angoni.

“Në përfundim kërkova nga të gjithë institucionet përmbushjen e detyrimit ligjor në drejtim të shkëmbimit të informacioneve dhe kontrollit të territorit duke ushtruar kompetencat ligjore, për përmbushjen me sukses të këtij prioriteti kombëtar”, u shpreh Angoni.

Drejtori i Policisë së qarkut të Shkodrës, Fatmir Lleshaj kërkoi një bashkëpunim më të ngushtë mes institucioneve dhe drejtorive lokale, pasi vetëm në këtë mënyrë mund të sulmohet me efikasitet kjo veprimtari kriminale, shkruan.

Takimi u zhvillua në kuadër të zbatimit të detyrimeve të përcaktuara në Strategjinë Kundër Krimit të Organizuar dhe Krimeve të Rënda 2021-2025, Plan – Veprimit Vendor, për sensibilizimin e komunitetit, parandalimin dhe goditjen e veprimtarisë kriminale të kultivimit të bimëve narkotike.