Në Muzeun Etnografik të Budapestit ekzistojnë rreth 300 objekte si bizhuteri dhe veshje shqiptare të cilat i janë shitur dikur këtij muzeu nga një tregtar me emrin Paolo Lazza.

Për të mësuar më shumë rreth këtij personi, muzeu i Budapestit u vu në kontakt me Muzeun e Fotografisë “Marubi” dhe pas një hulumtimi në të cilin u përfshi personalisht drejtori Luçjan Bedeni, u arrit të zbulohet se bëhet fjalë për tregtarin shkodran Palokë Laca, pasardhësit e të cilit jetojnë në Shkodër dhe Itali.

Drejtori i “Marubit”, Bedeni, së bashku me kuratoren Kim Knoppers dhe dizajnerin e modës Jozef Martini (njëherësh kushëri i Palokë Lacës) zhvilluan një vizitë dyditore në Muzeun e Etnografisë së Budapestit, ku panë nga afër koleksionin e mrekullueshëm.

Gjatë vitit 2024 muzeologët hungarezë vizituan Shkodrën me qëllim hulumtimin më në detaje të figurës së tregtarit Palokë Laca. Me këtë rast diskutua rreth mundësisë konkrete të ekspozimit të këtyre objekteve edhe në Muzeun “Marubi”.

300 objektet e shitura dikur nga tregtari shkodran, mund të jenë pjesë e një ekspozite e cila do të hapet në qershor të këtij viti në “Marubi”.

Muzeu “Marubi” në një postim në rrjetet sociale thotë se, nxjerrja në pah e kësaj figure si dhe zbulimi i këtyre reperteve në Budapest, vjen në mesin e një pune të ngritur prej disa muajsh nga kuratorja Kim Knopper mbi një projekt që do të realizohet në Muzeun “Marubi”, me fokus etnografinë dhe artizanatin.

Burimi ATSH