Kryeministri Edi Rama tha sot se ka përfunduar rehabilitimi i Pediatrisë së Specialiteteve në Tiranë, ndërsa informoi se “një program i ri do të hyjë në funksion vitin e ardhshëm, ku fëmijët që marrin shërbim në Spitalin Pediatrik të ndjekin shkollën brenda në spital me programe specifike”.

Duke folur për investimet e tjera të kryera në shëndetësi, Rama tha se “është ndërtuar spitali i ri ditor me 60 shtretër ku ka përfitim për 65 pacientë në vit që e shfrytëzojnë atë strukturë vetëm brenda një dite dhe që nuk mbingarkojnë pjesën tjetër të sistemit”.

“Janë rehabilituar 3 poliklinika specialitetesh dhe nga viti 2018 deri tani në vitin që po mbyllim kemi 400 qendra të reja në Republikën e Shqipërisë. Kishim 400 koteca të braktisura ku rrinte vetëm një infermiere dhe ku doktori shfaqej sipas rastit”, tha Rama.

Sa i përket ndërtimit dhe zgjerimit të kapaciteteve në Maternitetin “Mbretëresha Geraldinë”, Rama tha se “është në fazën e fundit”.

“Rehabilitimi plotë i spitalit rajonal të Kukësit dhe Lezhës, Krujës, godina e re e laboratorëve të Instituti të Shëndetit Publik rikonstruksionin e plotë në mjediset e spitalit Psikiatrik në Vlorë, spitali rajonal në Gjirokastër dhe së shpejti në spitalin rajonal i Dibrës se kontrata është lidhur”, tha Rama.