Ministri i Mbrojtjes, Pirro Vengu mori pjesë në mbrëmjen përmbyllëse të Forumit Mesdhetar të Rojës Bregdetare.

Ministri vëngu falënderoi pjesëmarrësit në këtë forum, i pari i organizuar në vendin tonë ku morën pjesë edhe përfaqësues nga vende të largëta si SHBA dhe Japonia.

Forumi i Funksioneve të Rojës Bregdetare Mesdhetare zhvilloi nga data 29-31 tetor mbledhjen e tij të radhës në Tiranë, organizuar nga Forca Detare/Roja Bregdetare shqiptare.

Ky forum, i cili kishte për qëllim të rriste bashkëpunimin midis agjencive të rojave bregdetare të vendeve mesdhetare, mblodhi përfaqësues nga 14 shtete anëtare, dy shtete vëzhguese, përfaqësues nga pesë agjenci dhe institucione të BE-së, si dhe organizata ndërkombëtare dhe institucione kombëtare.

Tema kryesore e forumit për këtë vit ishin “Sfidat e reja në detin Mesdhe: Ekonomia Blu, Tranzicioni Ekologjik dhe Funksionet e Rojës Bregdetare”.

Gjatë dy ditëve të forumit, u zhvilluan katër panele me fokus në praktikat më të mira dhe bashkëpunimin ndërmjet vendeve.

Forumi MCGFF është një mundësi e shkëlqyer për të forcuar bashkëpunimin rajonal dhe për të adresuar sfidat e zakonshme në detin Mesdhe, duke promovuar një qasje të përbashkët për ruajtjen e burimeve dhe sigurisë detare.

Forumi i Funksioneve të Rojës Bregdetare Mesdhetare (MCGFF) është një platformë vullnetare, jo politike dhe e pavarur, e përbërë nga 24 vende mesdhetare.

Takimi i parë i MCGFF me iniciativën e Italisë u zhvillua në Gjenovë, në vitin 2009.

Takimet e mëpasshme të forumit respektivisht janë zhvilluar në Francë, Spanjë, Portugali, Itali, Turqi, Francë, Marok, Itali dhe Shqipëri.

(ATSH)