Ministri i Mbrojtjes, Pirro Vengu deklaroi sot në prezantimin në seancën plenare të Kuvendit të projektligjit “Për disa ndryshime dhe shtesa në ligjin “Për shërbimin e kërkim-shpëtimit në Republikën e Shqipërisë”, se, “ky projektligj është një hap thelbësor, qoftë nga pikëpamja e linjëzimit me standardet ndërkombëtare, qoftë nga pikëpamja e rritjes së kapaciteteve të shërbimit të kërkim-shpëtimit në vendin tonë”.

Sipas tij, kjo vjen për dy arsye.

“Arsyeja themelore ka të bëjë me rritjen e trafikut ajror dhe rriten e trafikut detar në vendin tonë në mënyrë të qenësishme, përgjatë 3 viteve të fundit. Dhe pa dyshim kjo rritje, qoftë në shifrat e fluturimeve, anijeve për arsye tregtare apo turistike që kalojnë në ujërat tonë, vjen bashkë me detyrimin për të pasur një shërbim kërkim-shpëtimi më të mirë, një mbulim sa më të përafruar me standardet, qoftë nga pikëpamja e incidenteve detare, qoftë nga pikëpamja e incidenteve ajrore”, tha Vengu.

Ministri u shpreh se për të disatin vit radhazi numri i pasagjerëve të cilët vijnë dhe largohen përmes aeroportit të Rinasit është në rritje.

“Të dhënat tregojnë për janar-gusht 2024 krahasuar qoftë me vitin 2019, qoftë dhe me vitin e kaluar, një rritje domethënëse 2-shifrore në 3 vitet e fundit”, tha Vengu.

“Në të njëjtën periudhë kemi mbifluturime në hapësirën ajrore shqiptare, po ashtu me rritje dyshifrore. Të njëjtat trende janë nga pikëpamja e transportit detar në portet tona, sikundër në turizmin rekreativ, pra në tërësinë e spektrit të ekonomisë blu, kemi një rritje të trafikut në ujërat tona”, tha ai.

Vengu nënvizoi se, “arsye kryesore e ndërhyrjes së qeverisë në këtë pr/ligj është mundësia që shërbimi i kërkim-shpëtimit, qoftë nga pikëpamja e forcave ajrore, forcave tokësore dhe forcave detare të jetë në lartësinë e kësaj sfide të re në vendin tonë”.

Arsyeja e dytë, shtoi ministri Vengu, “ka të bëjë me linjëzimin me konventat ndërkombëtare, veçanërisht me Konventën e Aviacionit Civil Ndërkombëtar. Në bazë të këtyre konventave Shqipëria ka obligime ndërkombëtare për të ofruar një shërbim të besueshëm dhe efikas, të homologueshëm me shërbime partnere, veçanërisht në rastet e aksidenteve ajrore dhe detare brenda rajonit të përgjegjësisë së kërkim-shpëtimit të Republikës së Shqipërisë”, tha ai.

Vengu u shpreh se, fillimisht do të krijohen funksionet e mbikëqyrjes së kërkim-shpëtimit.

“Pra, kemi një agjenci ekzistuese që është Autoriteti i Aviacionit Civil, i cili do të mbajë sipas konventave ndërkombëtare edhe detyrën e monitorimit të shërbimit të kërkim-shpëtimit në Republikën e Shqipërisë dhe do të auditojë rregullisht, performancën, investimet, sistemet teknologjike, gjithashtu dhe kapacitetet njerëzore në funksion të këtij shërbimi 24-orësh në vendin tonë”, tha ministri.

Gjithashtu, shtoi Vengu, “risia e dytë ka të bëjë edhe me ngritjen e dy strukturave të reja pa krijuar agjenci, pa krijuar ente, pra pa asnjë impakt financiar në këtë pr/ligj, por më shumë për një përsosje të përshkrimit të detyrave dhe krijimit të detyrave të dy koordinatorëve të kërkim-shpëtimit në det dhe kërkim-shpëtimit në ajër, të cilat do të mbulohen përkatësisht nga Komandanti i Forcës Detare dhe Komandanti i Forcës Ajrore”.

“Këta koordinatorë do të jenë edhe autoritetet përkatëse për dhënien e lejeve, sikundër do të jetë edhe koordinatori kombëtar në funksionet e Shefit të Shtabit të Përgjithshëm të Forcave të Armatosura, i cili do të ketë edhe autoritetin e nevojshëm sa i përket bashkërendimit në rast incidentesh ndërkufitare, qoftë në hapësirën ajrore, qoftë në hapësirën detare dhe do të ketë mundësi të mobilizojë tërësinë e forcave dhe spektrin e forcave civile dhe ushtarake për shkak të urgjencës që mund të paraqiten në raste incidentesh ajrore apo detare”, tha ministri Vengu.

(ATSH)