Drejtoresha e Përgjithshme e INSTAT-it, Elsa Dhuli deklaroi sot se në Shqipëri numërohen 2.4 milionë banorë.

Në konferencën e organizuar sot për të publikuar të dhënat e dala nga Censi 2023 Dhuli bëri të ditur se Censi i popullsisë dhe banesave është një fotografi e çastit, që i referohet mesnatës së datës 17- 18 shtator 2023, të organizuar nga Instituti i Statistikave.

“Ky cens, vlerësoi në territorin shqiptar në datë 18 shtator 2023, 2 402 113 banorë, të cilët përbëjnë 755 950 familje, me madhësi mesatare 3.2 anëtarë për familje, të cilët jetojnë në 1 082 529 banesa të zakonshme”, deklaroi Dhuli.

Ajo e cilësoi një proces mjaft të rëndësishëm për shkak se ofron informacion thelbësor për matjen e objektivave për zhvillim të qëndrueshëm, për tu integruar përmes statistikave zyrtare si një domosdoshmëri dhe gjuhë e përbashkët për matjen e progresit të çdo vendi në familjen e madhe europiane.

Dhuli vuri në dukje se kryerja e Censit plotësoi një nga kushtet për hapjen e negociatave, rezultatet do të përdoren për të siguruar statistika të nevojshme, si pjesë e Sistemit Statistikor Evropian në të ardhmen.

Të dhënat, shtoi ajo, janë një e mirë publike, dhe ju ofrohen hartuesve të politikave, vendimmarrëseve, studiuesve, bizneseve, për ti përdorur për planifikimin zhvillimor, analizën e dukurive demografike, sociale, ekonomike dhe mjedisore, marrjen e vendimeve të rëndësishme dhe zbatimin e tyre në praktikë në dobi të shoqërisë sonë.

Censet, theksoi Dhuli, kanë siguruar të dhëna të vlefshme për të informuar politikbërjen dhe hartuar strategji kombëtare.

Por, siguroi ajo, nuk do të mjaftohemi me rezultatet që do të ndahen me ju sot, pasi puna dhe angazhimi ynë do të vijojë për sigurimin e informacioneve të detajuara, në nivel qarku, bashkie apo njësie më të vogël gjeografike. Analiza dhe studime tematike do të kryhen për fusha të ndryshme të jetës.

“Këto analiza do të jenë për përdoruesit një burim informacioni për të ndërtuar një të ardhme më të mirë, më të barabartë dhe të qëndrueshme për të gjithë shoqërinë”, deklaroi Dhuli.

Censi i vitit 2023 solli shumë inovacione si përdorimin e teknologjisë së informacionit në mbledhjen e të dhënave, një sistem gjeohapësinor të digjitalizuar, monitorimin në kohë reale të ecurisë dhe cilësisë së mbledhjes të të dhënave, një gamë më të gjerë informacioni të mbledhur.

Metodologjia, definicionet, konceptet u bazuan në rekomandimet e Komisionit Evropian të Kombeve të Bashkuara, për Ekonominë (UNECE) për raundin e censeve 2020, dhe rregulloret e Bashkimit Evropian.

Cens 2023, është i 12-ti në harkun kohor prej 100 vite, të historisë së censeve në Shqipëri dhe të hapjes së zyrës së parë të statistikave zyrtare. (ATSH)