Ministrja e Shtetit për Marrëdhëniet me Parlamentin, Elisa Spiropali u shpreh sot se hekurudha Durrës-Prishtinë do t’i japë një tjetër ritëm zhvillimi kryeqendrës së veriut, Shkodrës.

Në përfundim të mbledhjes dyditore të kabinetit qeveritar në Shëngjin, Spiropali u shpreh se synohet të ecet më shpejt drejt objektivit për kthimin e Shqipërisë në lideren e rajonit në të gjitha fushat.

“Mbledhja e fillimvitit për prioritetet e 2024-ës në parlament, qeveri dhe parti dhe diskutime nga sesioni i mbledhjes së zgjeruar të kabinetit qeveritar, për të ecur më shpejt drejt objektivit për kthimin e Shqipërisë në lideren e rajonit në të gjitha fushat”, tha ajo.

Spiropali vlerësoi faktin që hekurudha Durrës-Prishtinë, një projekt strategjik i dakordësuar në parim nga të dyja ministritë e Infrastrukturës do të kalojë nga Shkodra.

“Ky projekt madhor i jep një tjetër ritëm zhvillimi kryeqendrës së veriut”, theksoi ajo.