Kryeministri Edi Rama ndodhet sot në Romë me ftesë të kryeministres Giorgia Meloni, ku po merr pjesë në ditët e politikës, kulturës, debatit në Atreju 2023.

Rama zhvilloi edhe një bashkëbisedim me gazetarët Maurizio Belpietro, drejtor i “La Verità” dhe Andrea Malaguti, drejtor i “La Stampa”.

I pyetur se sa mundësi ka që ankimimi i depozituar nga opozita në Gjykatën Kushtetuese ta prishë marrëveshjen mes Shqipërisë dhe Italisë për migracionin, Rama u shpreh se, “Giorgia i përgëzoi kur bënë zgjedhjet e brendshme dhe mua nuk më njihte sigurisht, mendonte që isha një prej atyre miqve jo të rekomandueshëm siç e thoni ju, por rolet pastaj u ndryshuan”.

Por, shtoi Rama, “mbi të gjitha jam i kënaqur që të gjithë e kuptojnë, edhe ata në Shqipëri që goditen tërë kohën nga propaganda që Shqipëria nuk ka më demokraci sepse ka tashmë një diktator. Ndërkohë që Shqipëria është një demokraci. Gjykata Kushtetuese ka bërë detyrën e saj, sepse Kushtetuta është automatike, pezullimi i një marrëveshjeje për t’u marrë në shqyrtim përpara sesa të ratifikohet nga parlamenti. Kështu që kjo është provë që unë nuk i kontrolloj gjykatat në Shqipëri”.

Nga ana tjetër, theksoi Rama, “jam besimplotë, sepse marrëveshje nuk ka asgjë jo kushtetuese. Le të shohim pastaj të presim me qetësi vendimin, pastaj do t’i vihemi punës së bashku”.

“Brenda marsit është limiti i kohës, por unë mendoj dhe jam besimplotë që vendimi do të merret shumë më parë vendimi, sepse është një marrëveshje shumë e rëndësishme mes dy shteteve dhe duhet që të dyja qeveritë të dinë nëse mund të ecin përpara ose jo pa humbur shumë kohë”, tha Rama.