Policia e Shtetit përmes një videomesazhi të veçantë ka uruar shqiptarët për 111-vjetorin e Pavarësisë.

Në një postim në rrjetet sociale, Policia e Shtetit theksoi se “rreth 11 000 efektivë policie, me një dëshirë dhe një qëllim, sigurinë e shqiptarëve dhe të Shqipërisë, kontribuuan në çdo skaj të vendit, gjatë vitit të 111 të pavarësisë”.

“Për Policinë e Shtetit, ky është një përvjetor jubile, i cili shënjon rezultatet më të mira të arrira, beteja të fituara, miliona turistë që dëshmojnë standardet e sigurisë në Shqipëri, organizatë më solide dhe më të denjë, shkolla të padepërtueshme nga krimi dhe konfirmon ligjin, sundimtar të vetëm”, theksoi Policia e Shtetit.

“Nën flamurin e përbashkuar, si dhe nën pesha, përgjegjësi dhe privilegje të shumëfishta, ato të uniformës, të qytetarit, të birit/bijës, të prindit, efektivët e Policisë së Shtetit urojnë 111-vjetorin e pavarësisë së Shqipërisë. Punojmë çdo ditë për një dëshirë dhe për një qëllim, sigurinë e shqiptarëve dhe të Shqipërisë”, përfundon urimi i Policisë së Shtetit. (ATSH)