Dy delegacionet e kryesive olimpike të Shqipërisë dhe Bosnjë-Hercegovinës u pritën në një takim të nivelit të lartë me kryeministrin Edi Rama dhe Zv/ministrin e Sportit, Endrit Hoxha, njoftoi sot Komiteti Olimpik Kombëtar Shqiptar (KOKSH).

Kreu i qeverisë deklaroi se po mbështet me vendosmëri idenë e organizimit të Lojërave të Evropës Juglindore, propozuar nga Komiteti Olimpik Kombëtar Shqiptar (KOKSH).

Ditën e djeshme në ambientet e Komitetit Olimpik Kombëtar Shqiptar (KOKSH) është firmosur Memorandumi i bashkëpunimit me Presidentin e Komitetit Olimpik të Bosnjë- Hercegovinës.

Delegacioni kryesohej nga Presidenti i Komitetit Olimpik të Bosnjë-Hercegovinës, Izet Rodo, zv/presidenti Marijan Kvesic dhe Sekretari i Përgjithshëm, Said Fazlagic.

Bashkëpunimi konsiston në zhvillimin organizativ, gjenerimin e burimeve, krijimin dhe zhvillimin e strategjisë, shkëmbimeve të njohurive lidhur me programet e edukimit, trajnimit dhe zhvillimit të cilësisë sportive në vend duke vënë theksin tek sportet dimërore , implementimit të praktikave më të mira sportive dhe zhvillim të kampeve të përbashkëta trajnimi për sportistët.

Gjatë takimit u bë edhe një prezantim i gjithë punës që KOKSH ka bërë ndër vite dhe deri më sot me risitë më të fundit edhe në teknologji.

Krerët e delegacionit vlerësuan KOKSH-it për idenë e bashkëpunimit për sportet dimërore.

Presidenti i KOKSH-it, Fidel Ylli bëri një falënderim të veçantë për delegacionin dhe presidentin e Komitetit Olimpik të Bosnjë-Hercegovinës që vinin për herë të parë në vendin tonë dhe në ambientet e reja të KOKSH.