Amabasadori Luigi Soreca, i ngarkuar me punë i delegacionit të BE-së në Tiranë la sot detyrën të cilën e kishte rimarrë 3 muaj më parë.

Ai njoftoi në rrjetet sociale lënien e detyrës duke postuar edhe foto nga takimi i lamtumirës me stafin.

“Ishte nder dhe kënaqësi të drejtoja sërish ekipin fantastik të Delegacionit të Bashkimit Evropian në Shqipëri! Në tre muajt e fundit, ne kemi përmbushur shkëlqyeshëm misionin tonë për të mbështetur Shqipërinë në rrugën e saj drejt BE-së”, u shpreh Soreca në rrjetet sociale.

“Faleminderit shumë për përkushtimin dhe qëndrueshmërinë tuaj! Vazhdoni punën e shkëlqyer derisa Shqipëriabt’i bashkohet Bashkimit Evropian”, u shpreh ambasadori Soreca.

Po sot, në një intervistë për Zërin e Amerikës, në fund të mandatit të tij në Shqipëri foli mbi impulsin e ripërtërirë për zgjerimin, fazën tjetër të negociatave të anëtarësimit në BE, Planin e Rritjes së Komisionit Evropian, nevojën për të përshpejtuar reformat e lidhura me BE-në dhe inkurajoi SPAK të vijojë punën pa ndërhyrje për të krijuar historik të qëndrueshëm të goditjes së pandëshkueshmërisë.

(Marrë nga ATSH)