
Ambasadorja e BE-së pret Dhukën dhe Pirdenin, diskutime për ecurinë e negociatave dhe reformat
Ambasadorja e Bashkimit Evropian në Shqipëri, Sofia Moreira de Sousa, priti sot kryenegociatoren e Shqipërisë, Majlinda Dhuka dhe zëvendëskryenegociatoren Adea Pirdeni, në një takim me ambasadorët e vendeve anëtare të BE-së.

Ambasadorja e Bashkimit Evropian në Shqipëri, Sofia Moreira de Sousa, priti sot kryenegociatoren e Shqipërisë, Majlinda Dhuka dhe zëvendëskryenegociatoren Adea Pirdeni, në një takim me ambasadorët e vendeve anëtare të BE-së.
Takimi u zhvillua dy javë pas publikimit të raportit vjetor të Komisionit Evropian dhe udhërrëfyesit drejt vitit 2027, ku u diskutua për ecurinë e negociatave të anëtarësimit të Shqipërisë në Bashkimin Evropian.
Përmes një reagimi në rrjetet sociale, ambasadorja Moreira de Sousa bëri të ditur se Dhuka dhe Pirdeni prezantuan ecurinë e negociatave dhe ambicien e Shqipërisë përtej mbylljes së kapitujve, duke synuar ndërtimin e institucioneve që funksionojnë sipas standardeve të një shteti anëtar të BE-së.
Diskutimet u përqendruan te shteti i së drejtës, mjedisi dhe zbatimi i reformave në praktikë.
“Pikërisht kjo punë do të bëjë ndryshimin për shqiptarët”, theksoi ambasadorja e BE-së, Sofia Moreira de Sousa.
Burimi ATSH



















