Kryeministri Edi Rama reagoi sot ndaj deklaratës së kreut të Republikës Srpska në Bosnjë-Hercegovinë, Milorad Dodik, i cili kërkonte që Kosova, Mali i Zi dhe Republika Srpska t’i bashkohen Serbisë.

“Kanë kaluar tri ditë që nga deklaratat e rrezikshme dhe nxitëse kundër Bosnjë-Hercegovinës, Kosovës dhe Malit të Zi”, shkruan Rama në rrjetet sociale.

“Duhet të rrëfej, jam i befasuar nga mungesa e reagimit të deritanishëm nga partnerët tanë të BE-së dhe sinqerisht shpresoj që kjo heshtje të thyhet sa më shpejt!”, thekson kryeministri Rama.

Dodik dy ditë më parë tha se serbët në këtë shekull duhet “të formojnë një shtet të vetëm, të përbërë nga Serbia, Kosova dhe Mali i Zi, me mjete demokratike dhe masa politike, jo me luftë dhe t’ua lënë brezave të ardhshëm”.