Kryetarja e Kuvendit, Lindita Nikolla uroi sot Shtetet e Bashkuara të Amerikës me rastin e Ditës së Pavarësisë, 4 korrikut.

Nikolla shprehet mirënjohëse për rolin që ka luajtur SHBA, për mbrojtjen dhe zhvillimin e Shqipërisë dhe shqiptarëve.

“Mirëmëngjes, Amerikë, në 247-vjetorin e Pavarësisë! Nuk ka një rast tjetër, kur pavarësia e një vendi të ketë ushtruar në historinë botërore atë ndikim e fuqi ndryshimi të Deklaratës dhe shpalljes së Pavarësisë së Shteteve të Bashkuara të Amerikës”,- shkruan Nikolla në urimin e saj.

“Pavarësia e ShBA i dha jetë shtetit më të madh demokratik të botës dhe jetërsimit në parimet kushtetuese të të drejtave të patjetërsueshme të individëve: Jetës, Lirisë dhe kërkimit të Lumturisë”,- vijon Nikolla.

“Prej 4 korrikut 1776, Parimet e Deklaratës së Pavarësisë u bënë filozofia politike e zhvillimit dhe demokratizimit të kombeve të qytetëruara”,- nënvizon Nikolla.

“Ne jemi mirënjohës se ShBA kanë qenë dhe janë një mbrojtës i madh i mbijetesës, pavarësisë, zhvillimit dhe të ardhmes së shqiptarëve.”, shkruan Kryetarja Nikolla.