Në vijim të bashkëpunimeve të Qendrës së Ekselencës për Çështjet Detare (CEMA) me organizma vendas dhe të huaj, Porti i Durrësit mirëpriti drejtuesit e “Escola Europea”, me qëllim vendosjen e urave të bashkëpunimit në trajnime dhe kurrikula të përbashkëta.

Drejtori i “Escola Europea”, Eduard Rodés, pasi bëri një rezyme të rrjetit ndërveprues të Shkollës Evropiane me autoritetet portuale më të rëndësishme të Evropës, shprehu interesin për bashkëpunim edhe me Portin e Durrësit.

Kreu i Autoritetit Portual Durrës, Pirro Vengu, shprehu gatishmërinë e këtij bashkëpunimi nëpërmjet CEMA-s, si një mekanizëm që po jep efekte pozitive në formimin profesional në sektorin detar, gjatë këtyre dy viteve të aktivitetit të saj.

Bashkëpunimi do të finalizohet në vijim edhe me një marrëveshje mes dy palëve.

Qendra e Ekselencës për Çështjet Detare është një shkollë profesionale, një instrument bashkëpunimi rajonal në funksion të zbatimit të standardeve evropiane në fushën e shërbimeve portuale, si dhe një strukturë mbështetëse për sipërmarrjet novatore në logjistikën portuale, ekonominë blu dhe mjedisin detar.

CEMA shërben si qendër trajnimi dhe ndërtimi të kapaciteteve për profesionistët e detit si dhe një pikë takimi midis sektorit detar dhe akademisë.