Shqipëria është një vend me peizazhe të mrekullueshme dhe larmishmëri të pasur natyrore. Ajo ofron male, bregdet, liqene, lumenj, fusha të gjelbra dhe zona bregdetare të paprekura.

Vitet e fundit, ka arritur të bëhet një destinacion tërheqës për turistët e huaj për arsye të ndryshme, ndër të cilat artikuj të mediave të ndryshme botërore apo dhe vizitorë, që përçojnë përmes rrjeteve sociale vendin tonë. Risi kësaj here është organizimi i tureve në vendin tonë nga Australia e largët.

Intrepid Travel ka bashkëpunuar me MEET Network për të krijuar një ekspeditë të re 9-ditore në të gjithë Shqipërinë, duke eksploruar pjesë të vendit të vizituara rrallë nga turistët. Ky është udhëtimi i parë i pavarur australian në Shqipëri, që nis për herë të parë në shtator 2023.

Popullariteti i Shqipërisë është rritur vitet e fundit, falë peizazheve mahnitëse dhe të larmishme të maleve dhe vijave bregdetare, së bashku me kulturën e saj magjepsëse.

E përshkruar nga bordi i saj i turizmit si “guri i fundit i pandryshuar i Europës”, Shqipëria po fokusohet në udhëtimet alternative, duke promovuar agroturizmin dhe ekoturizmin – në vend të paketave të pushimeve në plazh – duke nxitur vizitorët të zhyten në natyrë dhe të takojnë komunitetet lokale për të pasur një përvojë më autentike.

Sipas të dhënave të marra nga agjencia australiane, axhenda e udhëtimit do të nisë në kryeqytet, Tiranë, më pas drejtohet në veri drejt rajonit mahnitës malor dhe liqenor të liqenit të Komanit për të ecur përgjatë lumit të Shalës.

Turi më pas do të vijojë në bregdet drejt peizazheve të mrekullueshme të Parkut Kombëtar Divjakë-Karavasta dhe Gjirit të Vlorës për një vëzhgim të shpendëve dhe eksperienca artizanale lokale.

Turneu përfshin një vizitë në Berat, i njohur gjithashtu si “qyteti i një mbi një dritareve”. /D.Hyka – MONITOR