Ministrja e Bujqësisë dhe Zhvillimit Rural, Frida Krifca e ka nisur vizitën e saj zyrtare në Gjermani, me një takim me homologun gjerman Cem Ozdemir, me të cilin ka diskutuar ndërtimin e një kuadri bashkëpunimi institucional të fortë mes dy vendeve në fushën e bujqësisë.

Ministrja ndau në rrjete sociale foto nga ky takim, teksa vuri në dukje se se “po ecim përpara në marrëdhëniet tona me Ministrinë Federale të Gjermanisë për Bujqësinë dhe Ushqimin duke ndërtuar një kuadër bashkëpunimi institucional të fortë”.

“Me një mik të vërtetë të Shqipërisë, Cem Ozdemir, Ministër i Bujqësisë dhe Ushqimit, po bashkëpunojmë për promovimin e Shqipërisë bujqësore e rurale në Gjermani, për programe zhvillimi të një bujqësie të zhvilluar, të përgjegjshme e të qëndrueshme”, theksoi ministrja Krifca.

Vizita e ministres Krifca në Gjermani, vjen pas vizitës zyrtare që zhvilloi në Shqipëri ministri gjerman i Bujqësisë dhe Ushqimit Cem Ozdemir, gjatë nëntorit të vitit të shkuar ku u diskutua për zhvillimin e qëndrueshëm të bujqësisë shqiptare dhe vendosjen e piketave të një strategjie kombëtare 7-vjeçare të bujqësisë e deri tek zhvillimi i një programi të ri ndihme për zhvillimin bujqësor dhe zonave rurale me ndikim të drejtpërdrejtë tek fermerët, blegtorët dhe agropërpunuesit në vend.