Kandidati i koalicionit “Bashkë Fitojmë” për bashkinë e Durrësit, Igli Cara, ka zhvilluar një takim me banorë të Katundit të Ri në Durrës.

Në bashkëbisedim me banorët, Cara ka premtuar investime serioze për infrastrukturën e zonës, si edhe mbështetje për fermerët.

“Kanalet kulluese, që nuk funksionojnë, i bashkohen një zinxhiri problematikash, me të cilat përballen banorët e Katundit të Ri dhe që ndër vite nuk kanë gjetur zgjidhje. Pa rrugë, pa kanalizime dhe të braktisur nga bashkia e Durrësit, megjithëse janë taksapagues të rregullt”, u shpreh ai.

“Në njësitë administrative të Durrësit duhen investime serioze për t’i dhënë fund gjendjes kritike për familjet që jetojnë e punojnë në këto zona”, theksoi Cara.

Ai premtoi, “mbështetje të plotë për fermerët, që do të nisë nga ndërhyrja e menjëhershme për rehabilitimin e kanaleve kulluese”.

“Ky do të jetë hapi i parë, për të nxitur prodhimin e produkteve bujqësore bio, që do të konkurrojnë në tregjet vendore e rajonale”, tha Cara.