Pianistja shqiptare gjashtëmbëdhjetë vjeçare, Klaudia Gjini, nga Durrësi ka dhënë dy koncerte të suksesshme në auditoret muzikore me emër të qyteteve La Korunja dhe Vigo, në Spanjë.

Interpretimi i saj i ka surprizuar muzikdashësit e pranishëm.

“Të shumta kanë qenë vlerësimet nga personalitetet më të mira të muzikës, që kanë çmuar lart talentin dhe përkushtimin e artistes tonë të re e me të ardhme. Në program janë ekzekutuar pjesë të autorëve botërorë e shqiptarë. Urimet më të mira, Klaudia, dhe suksese”, shkruan në njoftimin e saj nambasada e Shqipërisë në Spanjë.

Talentet dhe puna e tyre duhet të vlerësohen e promovohen. Ardhjen e Klaudias në 🇪🇸 për këto dy koncerte e ka përkrahur violinisti ynë, maestro Florian Vlashi, nga La Korunja dhe themelues, mes tjerash, i Bienale Netet e Muzikes Klasike në Durrës. Vetë Klaudia ka qenë fituese e këtij aktiviteti muzikor.

“Talente si Klaudia Gjini jane krenari për Shqipërinë por edhe shembuj për rininë e sotme. Sepse suksesi i saj nuk mbështetet tek “shkuma” e Internetit por tek puna, këmbëngulja e pasioni per Artin.
E past rrugën dritë!”, tha violinisti i famshëm shqiptar, Florian Vlashi, në një komunikim nga Spanja për TiranaDiplomat.com.