Nga Blerina Gjoka, Reporter.al
Në një dalje për mediat, Komisioneri Shtetëror i Zgjedhjeve, Ilirian Celibashi tha se udhëzimi ka si synim qartësimin e institucioneve publike se çfarë është një veprimatri publike institucionale dhe çfarë është veprimtari politike elektorale.
“Kjo paqartësi ekziston, edhe pse në shumicën e rasteve ata e kuptojnë shumë mirë, por përpiqen të gjejnë mënyrat që të kënaqin interesin e tyre politik”- tha Celibashi duke iu referuar monitorimit të aktiviteteve të raportuara që nga 14 janari, kur ka nisur ndalimi ligjor.
Udhëzimi sqaron kryetarët e bashkive në detyrë që rikandidojnë për zgjedhjet vendore dhe funksionarët e institucioneve të tjera publike se ata mund të zhvillojnë vetëm aktivitete që kanë lidhje direkt me përmbushjen e detyrës së titullarit apo funksionarit publik, dhe u ndalohet që tu japin këtyre aktiviteteve ngjyrime politike, elektorale.
Duke marrë shkas nga hetimet e fundit administrative të KQZ-së, ku disa kryebashkiakë u gjobitën për politizitimin e aktiviteve të tyre me pjesëmarrjen e deputetëve dhe funksionarëve partiakë, Celibashi u rikërkoi që të ndalojnë këtë praktikë.
“Nëse një kryetar bashkie bën një inspektim nuk duhet të marrë deputetë e as funksionarë të tjerë politikë të partisë, duhet të kenë enturazh vetëm nëpunësit e administratës”- tha ai, duke shtuar se ndalohen gjithashtu deklarimet politike, shfaqja e simboleve e sloganeve partiake, etj..
Udhëzimi po ashtu u ndalon funksionarëve publike që të përdorin rrjetet sociale të institucioneve për raportimin e veprimtarive politike, por mbetet i paqartë se si do të monitorojë këtë KQZ, kur shumica e funksionarëve publikë përdorin burimet publike për kontentin dhe menazhimin e profileve të tyre personale.
Ndërkohë, Celibashi nuk i dha dot një përgjigje të qartë pyetjes nëse kryeministri Edi Rama kishte shkelur Kodin Zgjedhor duke premtuar shpërblime për pensionistët dhe rritje pagash në prag të zgjedhjeve.
“Ndalimi ekziston për akte të qeverisë për rastin e zgjedhjeve të përgjithshme të Kuvendit të Shqipërisë. Por kjo nuk do të thotë se në vlerësim të disa rrethanave apo akte të caktuara të qeverisë mos të marrin gjykimin e vlerësimit mbi përputhshmëri të Kodit zgjedhor”- tha ai.
Përdorimi i burimeve njerëzore dhe fondeve publike për fushatë zgjedhore është një nga problematikat më të mëdha të proceseve zgjedhore në Shqipëri.Pavarësisht ndalimeve me ligj, partia në pushtet është kritikuar në raportet e vëzhguesve ndërkombëtarë të zgjedhjeve se ka përdorur asetet publike në funksion të fushatës partiake.
