Nga Dash Frashëri, botues i TiranaDiplomat.com
I mirënjohur në vend si sipërmarrës i suksesshëm në fushën e sigurimeve dhe ndërtimeve elitare, Dritan Çelaj, Kreu i Byrosë Shqiptare të Sigurimeve, befason artdashësit me një pasion, në dukje të fshehur, por në realitet, befasues, pasi veprat e tij, herë surreale dhe herë impresioniste, të fusin në botën e tij të brendshme, të kultivuar prej më shumë se dy dekadash.
Për publikun dhe median ai hap ekspozitën e tij të parë në Galerinë e Artit në Tiranë, me një emër mjaft të gjetur: “Allow Colors” ose “Lejo ngjyrat”.
Është paleta e ngjyrave të tij, herë të ngrohta dhe herë në kontrast. Diku gjen siluhetën e një nudoje artistike, një tjetër ka ngjyra pranverore, dhe një e trete me penelata vjeshtake. Katër stinët janë brenda artit konvencional të piktorit Dritan Çelaj. Një refleksion ngjyrash. Me individualitetin e tij.
Në ceremoninë zyrtare të hapjes të ekspozitës ishin të pranishëm njerëz të botës së artit, biznesmenë dhe figura të rëndësishme të fushave të ndryshme.
Ekspozita “Allow Colors” do të qëndrojë e hapur në Galerinë e Artit Tiranë.
