Nga Andi Kosta

Me datë 06 Mars 2023, në vigjilje të Festave të fillim-Marsit, përkatësisht Dita Kombëtare e Mësuesit dhe Dita Ndërkombëtare e Gruas, në mjediset e Galerisë së Arteve pranë Qendrës Multifunksionale Pogradec, u çel Ekspozita titulluar “BOTA E GRUAS DHE DASHURISË”, një koleksion i përzgjedhur punimesh në fushën e pikturës dhe fotografisë.

Punimet në Ekspozitë prezantuan 35 autore nga shtete të ndryshme evropiane, të cilat patën zgjedhur Pogradecin si Qytetin, ku të përçonin të veshur artistikisht ndjesinë, dhe emocionin e tyre përkthyer si:

“Ekspozita ndërkombëtare e fotografisë dhe pikturës dedikuar Jetëdhënëses Nënë, Qenies Femërore, kurora e krijimit të Perëndisë, me rastin e Ditës së Mësuesit dhe Ditës së Të Drejtës së Femrës që Në Emër të Jetës, të nderoj dhe të mbroj Jetëdhënësen Qenie Femërore!”

Ekspozita pra, shërbeu si një Platformë apo Forum ku vizualja fshihte klithmën për barazi gjinore, trajtim plot respekt të Qenies Femërore, e cila dhuron jetën, mbron jetën dhe zbukuron jetën njerëzore.

Çdo punim “fshihte” një “zë” apo “tingull” sa të dhembshëm, aq të revoltuar, sa të thekshëm, aq të vendosur kundër çdo diskriminimi, padrejtësie apo keqtrajtimi ndaj Qenies Femërore.

Qenia Femërore meriton tërë respektin, vëmendjen dhe kujdesin për shumësinë e qenieve që mbart në vetvete, Nënën, Motrën, Të Afërmen, Bashkëshorten, Shoqen, Profesionisten, Amvisën! Karakteri mëmësor, i ndjeshëm, intuitiv, i përulur, i rebeluar ndaj padrejtësisë, i papërtuar dhe të tjera veçori të karakterit femëror janë një tjetër kujtesë, të cilën e zgjon brenda çdo vizitori kjo Ekspozitë.

Organizatorët e kësaj Ekspozite z. Saimir Ahmeti dhe z. Bledi Como u mbështetën në këtë sipërmarrje nga Bashkia Pogradec dhe Qendra Multifunksionale Pogradec!