Kryeministri Edi Rama ka zhvilluar një bisedë telefonike me sekretarin amerikan të shtetit Antony Blinken pas vendimit të Shqipërisë për të pranuar një grup afganësh, që u rrezikohet jeta nga talebanët që morën pushtetin në Afganistan.

Sekretari Amerikan i Shtetit, Antony Blinken ka falenderuar Kryeministrin e Shqipërisë, Edi Rama për mikëpritjen e afganëve.

Me anë të një postimi në “twitter”, zyrtari i lartë amerikan nënvizon se i janë shumë mirënjohës për partneritetin e fortë midis Shteteve të Bashkuara dhe aleatit të NATO-s, në këtë rast Shqipërisë.

Postimi i Antony Blinken:

Faleminderit Edi Rama për ofertën e Shqipërisë për të siguruar strehë të sigurt për afganët në nevojë. Shumë mirënjohës për partneritetin e fortë midis Shteteve të Bashkuara dhe aleatit tonë në NATO.

Thank you to @ediramaal for Albania’s offer to provide safe haven for Afghans in need. Very grateful for the strong partnership between the United States and our NATO Ally.

— Secretary Antony Blinken (@SecBlinken) August 19, 2021

Edhe Zëdhënësi i Departamentit Amerikan të Shtetit, Ned Price njoftoi se Sekretari Blinken dhe kryeministri Rama u konsultuan në lidhje me ofertën e NATO -s bërë Shqipërisë për të pranuar përkohësisht afganët në nevojë.

“Sekretari Blinken falënderoi kryeministrin Rama për vazhdimin e traditës krenare të Shqipërisë për strehimin e njerëzve në nevojë. Sekretari dhe kryeministri riafirmuan partneritetin e ngushtë midis dy vendeve tona” , thuhet në njoftimin nga zëdhënësi i DASH-it, të publikuar nga Ambasada e SHBA në Tiranë.

Shqipëria ka bërë gati kapacitetet në Tiranë, Durrës, Berat dhe në Lezhë për të pritur grupin e afganëve.

Afganët që do të vijnë për strehim në Shqipëri do të qëndrojnë për një periudhë tranzitore, pasi destinacioni final i tyre do të jetë SHBA.