Derbi i kryeqytetit është gjithmonë një ngjarje e veçantë për futbollin shqiptar, dhe kjo fundjavë nuk do të bëjë përjashtim.

Të dielën, në “Air Albania”, në orën 16:30, Partizani dhe Tirana do të përballen në ndeshjen e tyre të 211-të, duke vijuar një histori rivaliteti që daton dekada më parë.

Deri më sot, janë luajtur 210 përballje direkte mes dy ekipeve. Partizani ka regjistruar 83 fitore, Tirana ka triumfuar në 62 raste, ndërsa 65 ndeshje kanë përfunduar me barazim. Këto statistika tregojnë balancën e fortë mes dy skuadrave dhe emocionet që çdo takim sjell për tifozët dhe dashamirësit e futbollit.

Derbi i radhës vjen në një moment ku të dy ekipet janë të përgatitura për të dhënë maksimumin në fushë. Rivaliteti i gjatë, historia e përballjeve dhe motivimi për tri pikët e rëndësishme e bëjnë këtë ndeshje një nga më të ndjekurat dhe më emocionueset në kalendarin e Abissnet Superiores.

Tifozët presin me padurim këtë derbi, dhe stadiumi “Air Albania” pritet të jetë i mbushur për të ndjekur një nga sfidat më të mëdha të futbollit shqiptar.

Biletat për ndeshjen Partizani-Tirana janë në shitje online përmes platformës T-ticket, si dhe në pikën fizike pranë stadiumit “Air Albania”.

Burimi ATSH