Ministrja e Arsimit, Mirela Kumbaro mori pjesë në mbledhjen e parë të Konferencës së Rektorëve, ku njoftoi se janë miratuar grantet për IAL-të publike përmes vendimit të bordit të Agjencisë Kombëtare të Financimit të Arsimit të Lartë.

Në Konferencën e Rektorëve ishte i pranishëm edhe Kryeministri Edi Rama si dhe 40 rektorë të universiteteve publike dhe jopublike, kryesuar nga rektori i Universitetit të Tiranës Prof. Dr. Artan Hoxha.

“Është një mbështetje prej rreth 11,2 miliardë lekë, ose 115 milionë euro, si grant për mësimdhënien, që ndahet në Fond Institucional dhe Fond për Mbështetjen Studentore duke mbështetur me paga rreth 5,800 personel akademik dhe administrative në 14 universitetet publike dhe mbi 12,000 studentë ekselentë apo me nevoja sociale, përmes skemës së bursave”, informoi Kumbaro.

Në fjalën e saj ministrja Kumbaro kërkoi edhe një raport më transparent për sa i përket mënyrës se si menaxhohen këto fonde. “Ministria e Arsimit, duhet të dijë saktësisht se sa fonde trashëgoni, në mënyrë që të kemi një shpërndarje më të drejtë”, theksoi Kumbaro.

Nga ana tjetër, vijoi Kumbaro, përmes Agjencisë Kombëtare të Kërkimit Shkencor, qeveria vë në dispozicion 7 milionë euro për kërkim shkencor dhe për infrastrukturë shkencore.

Më tej, gjatë fjalës së saj, u ndal tek problematikat lidhur me kërkimin shkencor.

Sipas saj, nga të dhënat e tre viteve të fundit, ka hendek shumë të madh mes projekteve të miratuara dhe projekteve të realizuara përmes mbështetjes së AKKSHI.

“Norma e realizimit të projekteve është shumë e ulët. Kjo na shtyn që nga ana jonë të gjejmë mënyra të tjera më efikase, në përputhje edhe me praktikat më të mira që kemi hulumtuar në Bashkimin Europian, të shpërndarjes së buxhetit; gjithashtu duke përfshirë edhe mekanizma si angazhimi shumëvjeçar i fondeve për projekte dhe pajisje duke mos mbetur peng i vitit fiskal – pasi universitetet funksionojnë me vit akademik; mundësi transferimi të fondeve nga një vit në tjetrin dhe auditim të bazuar në risk dhe justifikim shkencor”, tha Kumbaro.

Ministrja Kumbaro vuri në dukje se shpesh herë rezulton që edhe vetë nga IAL-të, për shkak të vonesave burokratike, bllokohen proceset duke kryer investime kërkimore të fragmentarizuara.

Kumbaro bëri të ditur se do të duhet të ketë një ristrukturim të Agjencisë së Kërkimit Shkencor dhe Inovacionit, për t’iu përgjigjur trendeve të reja.

“Shqipëria po përgatitet në mënyrë të qëndrueshme për procesin e integrimit në Bashkimin Europian, duke u fokusuar fort te ndërkombëtarizimi i universiteteve dhe përfshirja e tyre në projekte dhe rrjete akademike europiane. Kapitulli 25 dhe 26 që drejtohen nga Ministria e Arsimit kanë një avancim shumë të kënaqshëm dhe mendojmë se do jenë kapitujt e parë që do të mbyllen”, informoi ministrja.

Në këtë kontekst, ajo kërkoi që kërkimi shkencor duhet të ecë me hapin e kohës, të jetë konkurrues, i orientuar drejt inovacionit dhe i lidhur ngushtë me nevojat e tregut dhe sfidat bashkëkohore.

“Vetëm kështu, institucionet e arsimit të lartë mund të kontribuojnë realisht në zhvillimin ekonomik, social dhe teknologjik të vendit”, tha ministrja.

Gjithashtu, gjatë fjalës, Kumbaro kërkoi nga universitetet që të jenë një zë aktiv në ligjin e ri për arsimin e lartë, në mënyrë që të reflektojë një realitet të përmirësuar për të gjithë aktorët.

Burimi ATSH